TEXTOS DIALECTALES: LA NACENCIA

De NICOLÁS VALLE MOREA


La nacencia (Sigru XII)
 
Peru el comienzu de l’estremeñu hadi falta buscalu na reconquista. Nel sigru X i XI, lu que oi coincidi cola provincia de Cazris, que s’almientaba Trasierra, era un gran despobláu. Hasta el XII los lionesis i los castellanus nu pusun los piesis sobri la nuestra tierra i entavía tardarun bastantis añus en llegal al Tahu. Lión i Castilla pa nu topal na conquista de las tierras abandonás polus morus, partierun la Trasierra pol me de la Calzá de Guinea (lu que oi idin Ruta de la Plata) i que al pocu tiempu comenzarun a almiental "Estremaura lionesa" i "Estremaúra castellana". Coria se queó nel lau lionés i Plasencia nel castellanu. Los lionesis repoblarun los nuevus concehus con henti del norti del su reinu, que truherun con ellus la su lengua.
L’arranqui de l’astul-lionés i de toas las sus variantis (babli, mirandés, estremeñu) se remonta al tiempu en que nel norti, n’una zona mas grandi que agora, incluyendu Lión i Asturias, se comenzó a hormal un haci de palraerus romancis con muchus cairaitis propius que se desapartaban d’otras lenguas romancis nuevas: el galaicu-portugués, pol un lau, i el castellanu pol l’otru. A esa galra se le llamó lionés, anqui oguañu l’idin astul-lionés. Tous esus palraerus dierun la cara muchus sigrus sin el sostribaeru d’una escretura, ya que los escribanus, n’aquel tiempu, sólu echaban manu del latín. Peru pocu a pocu perdierun fuelli pol nu tenel un podel huerti detrás.
A metá del XIII los lionesis conquistan Cazris, Mérida i Badajós, mentri que Castilla se quea con Trujillu. Peru n’esi momentu, Lión, el primel reinu cristianu de la península, empieza a perdel influencia i se vio políticamenti embucháu pol Castilla, i ya, pa siempri, en 1226. Tou esu hidu que l’astul-lionés huera asimiláu pol castellanu i que perdiesi la posibilidá d’estendelsi lingüísticamenti.